Kafedraning tashkil etilgan yili va rivojlanish tarixi Fakultetlararo chet tillar kafedrasi 2019-yil 27-avgustda Toshkent viloyati Chirchiq davlat pedagogika instituti Kengashining 1-sonli qarori bilan tashkil etilgan. Ilgari “Xorijiy tillar” kafedrasi tarkibida faoliyat olib borgan bo‘lsa, keyinchalik mustaqil kafedra sifatida ajralib chiqdi. Kafedra mutaxassisligi ingliz tili bo‘lmagan yo‘nalishlar uchun xorijiy til sifatida ingliz tilini o‘qitish bilan shug‘ullanadi. Kafedra Chirchiq davlat pedagogika universiteti, 6-bino, 405-xonada joylashgan.

Kafedraning maqsadi va vazifalari Missiya: Talabalarning ilg‘or ingliz tili ko‘nikmalarini rivojlantirish hamda madaniyatlararo muloqot kompetensiyasini shakllantirish. Maqsadlarimiz:

• Kasbiy sohalarga yo‘naltirilgan dasturlar va ilg‘or pedagogik usullar orqali ingliz tili ta’limi sifatini oshirish.
• Xalqaro hamkorlikni kengaytirish – universitetlar, ilmiy jamoatchilik va ta’lim loyihalari bilan hamkorlikni yo‘lga qo‘yish.
• Ilmiy-tadqiqot muhitini rivojlantirish – til o‘rganish va filologik, pedagogik tadqiqotlar bo‘yicha innovatsion markazga aylanish. Fakultetlararo chet tillar kafedrasining o‘rta muddatli strategik rivojlantirish dasturi (2022-2025 yillar uchun) amalga oshirilmoqda.

O‘quv dasturlari Kafedra bakalavriat bosqichi talabalariga xorijiy til sifatida ingliz tilini o‘qitish bo‘yicha darslar olib boradi. 1-kurs o‘quv dasturlari:

• 60210400 – Dizayn – Xorijiy til
• 60220300 - Tarix – Xorijiy til
• 60310300 - Psixologiya – Xorijiy til
• 60410800 - Menejment – Xorijiy til 1, Xorijiy til 2
• 60610100 - Axborot tizimlari va texnologiyalari – Xorijiy til 1, Xorijiy til 2 3-kurs o‘quv dasturlari:
• Barcha ta’lim yo‘nalishlari uchun: Xorijiy til 1, Xorijiy til 2

Ilmiy-tadqiqot yo‘nalishlari va loyihalar Fakultetlararo chet tillar kafedrasi ilmiy-tadqiqot faoliyatida bir qator strategik yo‘nalishlarda ish olib bormoqda. Quyidagi yo‘nalishlar zamonaviy ta’lim talablariga javob beruvchi ilmiy tadqiqotlar olib borish, milliy va xalqaro ilmiy hamjamiyat bilan hamkorlikni kengaytirish hamda amaliy natijalarga erishishni maqsad qilgan:

• Ingliz tili o‘qitish metodikasi: Ingliz tilini xorijiy til sifatida o‘qitish metodologiyasini rivojlantirish kafedraning ustuvor yo‘nalishlaridan biri hisoblanadi. Leksik kompetensiyalarni rivojlantirish (N.T.Baltayeva), tanqidiy fikrlash ko‘nikmalarini rivojlantirish (Z.K.Jo‘rayeva) va mustaqil ta’limga yo‘naltirilgan yondashuvlarni (N.R.Saitkulova) takomillashtirishga alohida e’tibor qaratilmoqda. Psixolingvistik yondashuvlar asosida ta’lim jarayonini takomillashtirish bo‘yicha ham ishlar amalga oshirildi (F.O.Djabbarova).
• Mifologiya va adabiyotshunoslik bo‘yicha tadqiqotlar: Milliy va xalqaro adabiy merosni o‘rganishga qaratilgan. Ingliz, o‘zbek va qoraqalpoq mifologiyasini qiyosiy tahlil qilish orqali "odam" mifolegemasining turli madaniyatlardagi aksini tadqiq etish (N.X.Babadjanova). Hozirgi o‘zbek va inglizzabon nasrida hikoya janrining poetologik genezisi va rivojlanish tamoyillari o‘rganildi (A.S.Baisov). Gotik tematikali leksemalarning lingvokulturologik aspekti bo‘yicha ilmiy tadqiqot ham boshlab yuborilgan (Q.Sh.Maxmudov).
• Lingvistik tahlil va qiyosiy tadqiqotlar: Qiyosiy lingvistika yo‘nalishida ingliz va o‘zbek tillari doirasida ilmiy ishlar olib borilmoqda. Jumladan, paremiyalar, baynalminal so‘zlar va huquqiy terminlarning tarjima muammolari kognitiv va pragmatik nuqtayi nazardan tahlil qilinmoqda (D.B.Otajonova, E.G‘.Murodova, G.U.Maxamatxo‘jayeva, M.M.Xonsaidaova, R.J.Tenelbayev).
• Kommunikativ va didaktik kompetensiyalarni rivojlantirish: Talabalarning kommunikativ va ijodiy ko‘nikmalarini shakllantirishga qaratilgan tadqiqotlar muhim ustuvor yo‘nalishlardan biri bo‘lib, dars jarayonida innovatsion va ijodiy yondashuvlar orqali talabalarda mustaqil fikrlash ko‘nikmalari rivojlantirilmoqda (S.J.Samadova, F.O.Orazova, G.S.Xaldarchayeva, S.Sh.Zuparova, O.A.Hamraqulova).
• Madaniyatlararo kommunikatsiya va qadriyatlar: Madaniyatlararo muloqot kompetensiyasini rivojlantirish va umuminsoniy qadriyatlarni targ‘ib qilish muhim jihatlardan biri bo‘lib, bu borada jahon adabiyoti asosida milliy qadriyatlar va axloqiy ta’lim yo‘nalishida ko‘plab tadqiqotlar olib borilyapti (R.B.Usmonova, Q.Sh.Maxmudov). Mazkur yo‘nalishlar kafedraning ilmiy-tadqiqot salohiyatini yuksaltirishga va yangi zamonaviy metodologiyalarni rivojlantirishga xizmat qilmoqda.