Sanakulov Zayniddin Ibodullayevich

Sanakulov Zayniddin Ibodullaevich – ilm-fan va ta’limda nemis tili bo‘yicha yetuk mutaxassis

Sanakulov Zayniddin Ibodullaevich — O‘zbekiston davlat jahon tillari universitetining Nemis filologiyasi fakultetini tamomlagan, o‘z faoliyatini 2009-yilda ushbu oliygohdagi Leksika va stilistika kafedrasida boshlagan. O‘qituvchilik yo‘lida ilk qadamlarini qo‘ygan yosh mutaxassis bugunga kelib respublika va xalqaro miqyosda o‘z sohasining yetuk vakillaridan biriga aylandi.

2017-yildan boshlab Sanakulov Zayniddin Chirchiq davlat pedagogika universitetida faoliyat olib bormoqda. U so‘nggi yillarda Germaniya, Avstriya, Rossiya kabi mamlakatlarda malaka oshirib, ta’lim tizimida ilg‘or yondashuvlar bo‘yicha boy tajriba to‘plagan.

Zayniddin Ibodullaevichning ilmiy qiziqishlari nemis tilini chet tili sifatida o‘qitish metodikasi, madaniyatlararo kommunikatsiya hamda badiiy onomastikaning didaktik yo‘nalishlarini qamrab oladi. U bugunga qadar 60 dan ortiq ilmiy maqola va tezislar, bir darslik, to‘rtta o‘quv-uslubiy qo‘llanma hamda uchta lug‘at muallifidir.

Professor-o‘qituvchi sifatida u nafaqat nazariy fanlar – “Nemis tili nazariy grammatikasi”, “Leksikologiya”, “Umumiy tilshunoslik”, Nemis tilini o'qitishni o'rganish (DLL) balki amaliy mashg‘ulotlar – “O‘qish va yozuv amaliyoti”, “Til aspektlari amaliyoti”, “Nutq ko‘nikmalarini integratsiyalash” kabi kurslarni ham olib boradi.

2022-yilda u “So‘z yasalishi va uning leksikografik aspekti (nemis va o‘zbek tillari misolida)” mavzusidagi dissertatsiyasini muvaffaqiyatli himoya qilib, 10.00.06 – Qiyosiy adabiyotshunoslik, chog‘ishtirma tilshunoslik va tarjimashunoslik yo‘nalishi bo‘yicha filologiya fanlari bo‘yicha falsafa doktori (PhD) ilmiy darajasini oldi. 2023-yilda esa unga dotsent ilmiy unvoni berildi.

Hozirgi kunda Sanakulov Zayniddin Nemsi tili kafedrasi mudiri sanalib, o'z DSc – fan doktori ilmiy darajasini olish yo‘lida ilmiy izlanishlarini davom ettirmoqda.

U nafaqat o‘quv va ilmiy jarayonda faol, balki xalqaro miqyosdagi hamkorliklarda ham tashabbuskor. Bugungi kunda u Laybnits nomidagi Nemis tili ilmiy-tadqiqot instituti (IDS Mannheim) Xalqaro ilmiy kengashi a’zosi bo‘lib, IDS (Mannheim), Haydelberg pedagogika universiteti hamda Myunster universiteti bilan ilmiy-metodik hamkorlikning koordinatori sifatida faoliyat yuritmoqda.

Sanakulov Zayniddinning ibratli faoliyati ta’lim tizimida raqamlashtirish, metodik innovatsiyalar va xalqaro integratsiyaning amaliy ifodasi bo‘lib xizmat qilmoqda. U nemis tili bo‘yicha zamonaviy va sifatli ta’lim berish, ilmiy salohiyatni oshirish hamda yangi avlod nemis tilshunoslarini yetishtirish yo‘lida fidokorona mehnat qilmoqda.